لاہور: لاہور ہائیکورٹ نے سابق وزیر قانون پنجاب رانا ثناء اللہ سے تاحکم ثانی سیکیورٹی واپس نہ لینے کے احکامات جاری کرتے ہوئے پنجاب حکومت سے جواب طلب کرلیا۔

جمعے کولاہورہائیکورٹ کے جسٹس شمس محمود مرزا نے رانا ثناء اللہ کی جانب سے سیکیورٹی فراہم کرنے کی درخواست کی سماعت کی ۔

سابق صوبائی وزیر قانون رانا ثناء اللہ کے وکیل نے عدالت کو بتایا کہ ان کو دی گئی سیکیورٹی واپس لی جا رہی ہے،سیکیورٹی کیلئے متعدد محکموں میں درخواستیں دائر کیں مگر کوئی جواب نہیں ملا، انتخابات کے بعد سے انہیں مسلسل دھمکیاں موصول ہو رہی ہیں۔

انہوں نے عدالت سے استدعا کی کہ پولیس حکام کو سیکیورٹی فراہم کرنے کا حکم دیا جائے۔

عدالت نے دلائل سننے کے بعد موجودہ سیکیورٹی تاحکم ثانی واپس نہ لینے کا حکم دیتے ہوئے آئی جی پنجاب سمیت دیگر فریقین کو نوٹس جاری کر دیئے ہیں۔